BOJA

I.

BOJA

apud citimae aetatis Scriptores, compes est aut torques vinctorum. Gloss. Latino-Graecae: Κλοιὸς, Boia, Eculeum. Glossar. Anglo-Saxon. Aelfrici, Nervi, Baia etc. Sed et iam apud Plautum,

invenias in Asinar. Actu. 3. sc. 2. v. 5. Carceres, numellas, pedicas, boias, tortorcsque acerrimos: e quibus Boias verbis hisce Gotselini de Miracul. S. Augustini Cantuar. c. 16. illustrari ait Car. du Fresne: In arctissimum cippum omni compede durius constrinxêre. Addunt ferreas manicas manibus et collaria ferrea in cervicibus, ita ut per medium maceriae lapidei cubiculi transducta vincula obducantur. Et mox, Iuvenem --- atrocioribus tormentis aggrediuntur. Stringuntur surae et ossa arctiori lignô incussis sudibus coactô, etc. Vide de Berniculi dicta Ioinvillae et Car. du Fresne Dissert. ad eum, ut et Wencessaum in carcere depictum, apud Petrum Lambecium Comment. de Bibl. Caes. l. 2. p. 752. Martyrum collum hôc vinculi genere constringi consuevisse, habes in Adonis Martyrol. ubi de S. Alexandro Episcopo Romano. Tolle boiam de collo meo et impone ei: quam, veluti sacrum λείψανον, Caroli M. iussu in Aede S. Salvatoris, prope S. Petrum in Vaticano fuisse repositam, videas apud Macrum in Hierolex. Sic Prudentius, Perisieph. Hymn.

1. v. 46.

Carcer illigata duris Colla boiis impediit, etc.

Tralatitie stolam denotat; item fasciam, quam in celebribus ac liberis civitatibus, in signum gubernandi iugi, Magistratus sibi ipsi super humeros imponit. In Sicilia, DD. Ecclesiastici super cottam seu rochettum, ad modum stolae, nigti coloris, deferunt, quae Graecâ voce γόη, i. e. sulcus nuncupatur: quae tamen in Insul. Melita solis Theologis super im ponitur. Vide infra in voce Taraga. Sed et in ptimordio Equites de Alcantara tulisse aliquas fascias huiusmodi latas ex panno, Castellanô idiomate Chias nominatas, in MSS. antiquis leguntur, apud Macrum l. cit.

II.

BOJA

urbs Boiorum, populorum Galliae Celticae, quae nunc Bourbon dici putatur, unde Regiae Familiae nomen. Nunc oppid. a Molino 4. leuc. in Auftrum, ubi thermae variis morborum generibus salutares. Ferrar.